重音問題

上老人科嘅堂，十有八九都係 Fall 嘅症，亦即係「跌親」。唔好睇少呢一樣野，點解跌、如何跌、跌親邊、點落地、點樣醫、點樣唔再跌、返屋企點照顧…，事實上「跌親」可以話係老人科最重要嘅病，唔少老人家真係一跌就會手尾長，跟住就會仙遊。

今次見嘅婆婆，晨早流流落街買餸跌親，要做手術上返哂螺絲。想知道佢點解會跌，我地成班同學就去 clerk 一 clerk 呢個 case。

同學：「婆婆，你本身有無咩長期病患架？」
婆婆：「無呀！」
同學：「糖尿、血壓、膽固醇個類野喎？都無？」
婆婆：「有呀有呀！有血壓同埋膽固醇。」
同學：「…」

同學：「咁你之前有無做過手術呀？」
婆婆：「有呀。十幾年前，係瑪麗做！」
同學：「做咩手術呀？」
婆婆：「切腳趾公。」
同學：「下？左面定右面呀？」
婆婆：「成個！」
同學：「下？」

我望一望，拉一拉同學，指一指。十隻腳趾齊哂喎，莫非婆婆係 X-man 識自我復原 …

同學：「係糖尿所以要切架？」
婆婆：「唔係呀！女人野呀！」

有咩婦科病會搞到腳趾公架呢 …

女同學：「呀！唔係呀！係切子宮呀！」
所有人：「哦…」