無錯，係 SOL，唔係 KOL。SOL，全名 Space-Occupying Lesion，中譯「阻住位置嘅損傷」，理論上係用黎形容腫瘤，實際上，佢係醫學生嘅別稱。
醫學生係醫療體制入面最低微嘅一群。一般醫護人員有各自嘅工作，就算係護理系學生都可以幫助到病房日常運作，唯獨係醫學生係病房出現係不能夠作出任何貢獻，無得幫手、無得工作，只可以上堂、Clerk Case 同埋企。因著我地嘅無能，我地嬴到好多嘅稱號，包括牆紙、Drip Stand (吊鹽水用嘅支架)等等。個人黎講，呢一堆都已經係美譽，正如開講有云，「一張廁紙都有佢嘅用處」，Drip Stand 其實比醫學生有用太多，所以我個人認為最貼切嘅稱號，依然係 SOL。
今日我就帶大家睇下 SOL 嘅生活。
一班腫瘤黎到手術室上堂，觀摩手術，怕怕羞羞咁企左係角落。
外科醫生：「企咁遠做咩！睇鬼到咩！過黎！」
腫瘤於是轉移左去手術枱枱頭。
麻醉醫生：「呢到無菌區，麻醉儀器係哂到，唔好企呢邊。」
腫瘤於是轉移左去手術枱側面。
護士姐姐：「唔好企呢面！儀器放哂係到，我會做唔到野！」
腫瘤於是轉移左去手術枱床尾。
外科醫生：「較燈！」
護士哥哥：「係！學生唔該唔好阻住張櫈，我要整好盞燈。」
腫瘤於是返返去一開始嘅角落。
識唱一齊唱：又回到最初的起點…
Dr Who 
發表留言